-->
recent

مواضيع تهمك

recent
random
جاري التحميل ...

الصمود المتوحش

ــــــــــــ بسم الله الرحمن الرحيم ــــــــــــ
نبتدى بقي ๏̯͡๏


ياما بنقابل ناس وبننخدع فيهم مش عشان إحنا سذج بالعكس عشان إحنا طيبين وبندي الأمان والاستقرار وبنضحك مع الكل

كانت عام 2022

2022

كانت عام 2021

2021

كانت عام 2020

2020

كانت عام 2007

2007

صورة من الألبوم
المدونة : بكره أحلي
    اسمي : خالد مجدى زكى
    يوم ميلادى : 1986/10/18
    من هواياتى : 
      ♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡
    جزء من حياتى..!

    أسف على الإطالة بس ممكن تعمل Save لو مش فاضي دلوقتي وحاول تقرأ للأخر 

    أوعي تشوف نفسك بعيون الناس عشان المواقف بس هي اللي بتبينلك أنت مين وتقدر تعمل إيه وتسكت على إيه وتصبر على إيه..
    المواقف الصعبه عدت عليا كتير بحكم اللي شفته وعشته 😞

    ▫️اكتشفت إن فيه مواقف ممكن تخلي الأبيض أسود والمحترم قليل الذوق والقطه المغمضه بتبقى أسد مش شايف قدامه،

    وده مبيكونش بين يوم وليله بيكون ناتج عن حاجات كتير اتسببت في كده،

    ▫️أهم حاجه ماتخدش قرار وأنت مستعجل،
    فيه أمور بيكون التجاهل فيها أو السكوت أحسن من مليون كلمة ممكن تتقال بدون لازمه،

    ▫️متكتبش كلام تندم عليه بعد كده، ومتبصش للأمور بعين ضيقه بصلها بشكل واسع من كل الأتجاهات وحللها كويس أوي حط نفسك مكان كل واحد وأنت هتفهم هو عمل كده ليه..

    ▫️ألتمس لأخيك سبعين عذراً فأن لم تجد له عذرا فقل له عذراً،
    ▫️لو حبيت تبعت كلام ممكن يضايق حد متبعتوش ساعتها الأول نام وروق بالك وأصحى فكر في كلامك ده تاني هتلاقيك كنت ممكن تخسر حاجات كتير لو بعته وهتقول الحمد لله اني مبعتوش ساعتها،

    ▫️العالم مش هيفرق معاه حاجه وجودك زي عدمه نجاحك أو فشلك فرحك أو حزنك،
    بس هيفرق معاك انت اذا كنت عايز تبدأ وتبقى أنسان جديد حياه جديده من الألف للياء أو نويت تدفن نفسك في ذكرى معينه وتستسلم ليها،
    مش لازم تكون كامل الكمال لله.

    ▫️كلنا مليانين عيوب ولولا ستر ربنا لكانت بانت عيوب عمرك ما كنت تفكر إنها موجوده لإن المريض مبيشوفش إنه مريض لأنه لو شاف هياخد الدواء بس كفاية إنك تكون مش كداب أو منافق أو بتاع مصلحتك.

    ▫️ولما تدي حد بتحبه أكتر من فرصة عشان متخسروش وهو مصر يخسرك..!!
    حط حبك على جنب وإخسره،
    متجريش ورا حد عشان هتتعب وماتدورش ورا حد عشان هتتعب، لو خرجت من حياة حد خرج معاه كل حاجه ممكن تفكرك بيه حطها على جنب في صندوق ذكرياتك وبطل تراقبه من بعيد محدش هيتوجع غيرك أنت متراقبش حد خرج من حياتك، من الأخر خليك في حالك يرتاح بالك والباب اللي يجيلك منه الريح سدو واستريح عشان جرحك يلم بطل كل شويه تلمسه بحجة ان انت بتطمن عليه.

    ▫️أسوء علاقة هي اللي بتنتهي بدون مبرر بدون سبب بتلكيكه تخلي عقلك يهنج مِن التفكير وأنت بتسأل هو حصل إيه، مين غلط، مين بداء طيب مين انتهي !!!!!!
    ▫️حاجه صعبه إنك تمسح ذكرى من بالك بس هيجي عليك وقت لازم تمسحها لازم تنساها بتفاصيلها الكبيرة والصغيرة سواء كانت يوم أو إتنين أو حتي سنين (هتنساها) عشان تعرف تكمل عشان تعرف تعيش،

    ▫️أهلك ثم أهلك ثم أهلك الأب هو ذلك الرجل اللي تطلب منه نجمة يعود حاملاً السماء لك،
    الأم مش هيكفي لو كتبنا فيها بأقلام العالم كلها،
    أخواتك سندك أهلك عزوتك دول خليهم دائماً في ركن لوحدهم ورأيهم يحترم ومتضايقش حد فيهم إحنا عايشين في الدنيا دي ببركتهم،
    بر أهلك بر أهلك بر أهلك.

    ▫️أحنا مش ملائكة أكيد لازم غلطنا أو بنغلط أو هنغلط أهم حاجه أنك لما تغلط تعتذر عن غلطك ده سواء الإعتذار هيجيب نتيجة أو لأ،
    لكن الإعتذار قوة مش ضعف، الإعتذار ثقافة راقية يعتقد الجاهلون إنها إهانة للنفس.

    ⚠️نصيحة من أخوكم الصغير مش كل واحد هيوجهك للطريق الصح مش كل واحد هيتمنالك الخير ولما تاخد رأي حد في موضوع مهم متاخدش برأي أي حد وخلاص لالالاااااأ 🥹
    الموضوع ليه أبعاد تانيه مش هتعرفها غير لما تاخد رأي الناس الصح اللي فعلاً هينصحك ليك ومش هيقولك رأيه مجرد تحصيل حاصل ويرجع يقول بعد كده أنا مليش دعوه..
    ▫️الناس اللي بتنصحك عشان عايزه مصلحتك دول كمان خليهم في جنب لوحدهم في ركن كده من ألماظ أحتفظ بيهم عشان مش هتلاقي كل واحد عنده الناس دي اللي تنصحه، دول ليك أنت..!

    ▫️الإحتياج لشخص في فترة معينة من حياتك ممكن يحول حياتك لجحيم لو الشخص ده إتنازل عنك وسابك فى نص الطريق هتلاقي جواك فراغ كبير ملئته بيه،
    بس هو سابك وعنده بديل ليك تاني يملئ الفراغ اللي أنت فاكر نفسك سيبته فيه،
    عشان كده متحتجش لحد ومتتعلقش بحد أنت مش قرد عشان تتعلق في الشجرة،
    ▫️اللي غاب زي اللي مات الأتنين واحد واللي علي وقت الإحتياج موت كل حاجه حلوة كانت ليه، إكتفي بنفسك بس ولو حتى هتكمل العمر لوحدك، الوحدة يمكن صعبه بس مريحه أوي بعيد عن عالم النفاق والكدب وكل الناس عايزينك عشان مصلحتهم هما وبس،
    كل الناس بيشوفوا الحاجه اللي تبسطهم محدش هيفكر دي هتبسطك أو هترتاح فيها ولا لأ محدش بياخد باله وهو بيضغط عليك بس بياخدوا بالهم لما نتغير، محدش بياخد باله وهو بيجرحك بس بياخدوا بالهم لو بقيت عصبي، محدش بياخد باله وهو بيصغرك بس بياخدوا بالهم وأنت مبتهتمش بيهم،
    كل واحد بياخد باله من اللي بيإذيه هو بس، مش اللي بيأذيك أنت

    ▫️فكر كده لو مت النهارده هيحصل حاجه ؟!
    1️⃣ عادي جداً بكره هينزل إعلان عن وظيفه مكان وظيفتك،
    2️⃣ خطيبك أو زوجك هيتجوز غيرك،
    3️⃣ أهلك هيكملوا حياتهم بعدك،
    4️⃣ أصحابك هيفتكروك بالخير بس محدش هيموت عشانك فمتموتش نفسك ولا إحساسك عشان حد،

    محدش يستاهل بجد مش لازم يكون فيه حد في حياتك عشان تعيش أو تعيشي مبسوطة، أوقات كتير الوحده بتكون أحسن من مليون حد معاك، ممكن يكون معاك كل الناس بس حاسس بالوحده ومتضايق، ممكن تكون لوحدك بس مش محتاج حد معاك وبالك رايق وراحة البال عمرها ما كانت في إنسان أو فلوس، راحة البال أكبر نعمة من ربنا حافظ عليها لو راحت مش هترجع تاني..

    😅 اللحظة الفارقة في حياتك 😅
    خليك جرئ ومتخافش، ولعل ما تخشاه ليس بكائن ولعل ما ترجوه سوف يكون،
    خلي عندك شخصية واخسر اللي خايف تخسره عشان تبطل تخاف،
    في العلاقات متدورش على اللي بيشوف اللي بيسعدك فبيعمله دور على اللي عارف اللي بيضايقك فمبيعملوش،
    ولازم يبقى عندك الشجاعة إنك تنسحب وقت ما تحس إنك خلاص مبقاش مرغوب فيك إنسحب بهدوء و أمشي.

    ❤️ الحب أحلى حاجه في أي علاقة
    *البدايات* 🥰
    كل الناس في الأول كويسه بس الثبات للصادقين في حبهم!
    العند وحش أوي و التعامل بمبدأ واحده بواحده وغباء إنك تحب بزياده دي مش حاجه حلوة أنت كده بتهين نفسك وبتيجي عليها
    ومش كل حد مهتم بيك ده مهتم بجد وفيه ناس بتهتم كمرحلة، ناس بتهتم كمصلحة،
    مكانت الناس جوانا مبتتغيرش إلا بتصرفاتهم! فبلاش تهتم بزياده و عز نفسك وقدرها وإذا سكن الله قلباً حرص عليه من الإنكسار

    ومتحبش قوي عشان القوة لله وحده و أسمع اللي بتحبه وخليه يقول كل اللي جواه حتى لو كان خايف و متزهقش منه و متسيبوش لوحده وخليك دائماً جنبه،
    حسسه بالأمان وإعرف إزاي تحتويه أوووووي وإنك تسمعه دي لوحدها حب منك بس لما تسيبه حتى لو يوم مش هيلاقي اللي يسمعه غيرك ويمكن بعد ما كنت في كفه و الدنيا في كفه تلاقي نفسك بره الكفتين، أسمع حتى لو مش هتتكلم بس متسيبوش لوحده.

    ▫️لما بيحتاجولك بيلاقوك ولما بتحتاج لهم مبتلاقيهمش صح ؟!
    عادي علي فكرة إعرف إن كسر الخاطر مبيجيش غير من اللي بنحبهم،
    وسامحهم أنت وإدعي لهم ومتبقاش أنت والأيام عليهم، والكاظمين ألغيظ والعافين عن الناس، خليك قوي، الأيام مبتجيش في صف الضعيف أبداً..

    ▫️متفتكرش بإن خبرتك في الحياة هي عمرك اللي عايشه،
    خبرتك الحقيقية هي التجارب اللي بتدخل فيها في الحياة، هي إحتكاكك بالناس، هي إنك تعرف تتعامل وتتكلم وتسكت وتزعق وتصالح وتعمل مشكلة و لو وصلت للضرب تضرب كمان..

    ▫️الحياة مش شفافة أوي عشان تعيشها ببساطة و متديش كل حاجة حقها، حياتك حقك تعيشها صح وتجرب مره وإتنين وعشرة، راعى الله لحد ما تقتنع فعلاً،
    كل حاجه بتبقي حلوة في الأول بس، لكن الحلاوة الحقيقية هي اللي بتيجي مع الأيام بعدين، لما الوشوش تظهر ونلاقيها ثابته علي موقفها، لما تدخل في صراعات وتلاقي اللي واقف مباعكش، أيوه والله هي دي الخبرة الحقيقية..!

    لكن ممكن يكون عندك 70 سنة و واحد عنده 20 و لا 30 سنة عنده خبره في الحياة عنك لإن الخبره هي التجارب،
    وعشان صوابعك فعلاً مش زي بعضها والأخلاق والمعدن الطيبب الخلافات هي اللي بتبين لك أصل الناس،

    كل الناس كويسه في اللحظات الحلوة، والخلافات هي اللي بتعرفك قيمتك الحقيقية عندهم،
    و مش مهم يكون في جيبك مصحف الأهم إنك تكون في أخلاقك آية،
    و متندمش على إنك قدمت حاجات كويسه ومشاعر بجد لحد مستاهلهاش كفايه إنك كنت رائع وكريم وأنت بتقدمها ليه..

    ▫️العلاقات لما تنتهي مش لازم تتحول لإنتقام ومشاكل وصراعات!
    وهتعدي عليك سنين بعد إختيارك إنك تطلع من حياة ناس وهتشوفهم و هتحمد ربنا إنك طلعت من حياتهم سواء برضاك أو غصب عنك،
    قلة التقدير لما تحسها من حد أنت حاطه في خانه ومكانه لوحده و هو راكنك علي الرف بكل برود وتلاقي نفسك في حياته مرحلة مؤقته شئ مهين جداً بجد،

    إبعد على طول ومتفكرش و مع الأيام هتعرف ربنا بعدك عنهم ليه قول بس كانت فرصة سعيده ودرس إتعلمنا منه و الموضوع بسيط والله..

    ومفيش ظروف تخلي الوعود متتحققش غير إن الوعود من البداية كانت مزيفه،
    ومتوعدش حد بحاجه أنت مش قدها لإن الوعد عهد عليك و الكلمة عهد و النظره عهد و اللمسة عهد و العهد مبيتقالش لأي حد مترميش وعود وعهود علي الفاضي عشان بتتحسب عليك وهتترد لك في يوم من الأيام لما تخلف بعهدك..

    ▫️مفيش حاجه إسمها محدش بيختار اللي بيوجعه!
    كلنا من البدايه شايفين النهايه وعارفينها كويس أوي بس بنكدب نفسنا و مفعول الحب بيكدبها و بيخلق مميزات من العيوب وكلنا من اللحظة الأولى عارفين الشخص ده هينفع ولا لأ، بس بنكابر وبنخلق حجج فارغة عشان إحنا أجبن من إننا نعترف ان اللي بنحبهم هيكسرونا و هيوجعونا في يوم من الأيام،

    ولما حد يتوجع من اللي بيحبه بلاش كلام من اللي هو إحنا حذرناك من الأول بلاش إحنا كنا عارفين كده  و تستاهل بقي اللي جرالك، بلاش اللوم و العتاب بالطريقة دي،

    آااااه كنا سامعينكم وعارفين إن إحنا غلط وعارفين الحقيقة لكن الحب أقوي من أي شخص و أقوي من العقل و الحب أصل الوجع كله و محدش هيإذيك إلا الشخص اللي حبيته من كل قلبك و حطيت ثقتك فيه في يوم من الأيام،
    و خليك فاكر كلامي ده كويس أوي..

    ▫️متتعودش تشوف الحاجات من بره وتحكم عليها عشان جوه الكتب حاجات كتير لو قرأتها هتعرف إن الغلاف ملهوش علاقة بالمضمون،

    إقرأ الكتاب كويس أوي قبل ما تحكم على غلافه وإقرأه كلمة كلمة و حرف حرف و خد بالك من كل التفاصيل من أول المقدمة و الأهداء و أرقام الصفحات، هتلاقي جواه كلام حشو كتير أوي خد بالك من التفاصيل المهمة و مش مهم الحشو ده المهم التفاصيل الصغيرة المهمة اللي هتخليك تعرف تحكم كويس علي الكتاب كويس و لا لأ،
    مش كل الحكم من بره فيه حاجات كتير بتتصور وبتتمسح في المونتاج و لما المطر ينزل تدوب كما المكياج 😢
     🦋 الفراشة رغم جمالها بس حشرة و 🌵 الصبار رغم قساوته بس زهرة و إتعلم تحكم علي الحاجه من جوه متتخدعش بالمظاهر..

    ▫️علي فكرة البعيد عن العين مش بعيد عن القلب 🙂
    البعيد عن العين بيتجاب في سيرته كل يوم و كل ساعة و كل دقيقة،
    البعيد عن العين بيتحلم بيه كل يوم،
    البعيد عن العين بيتراقب كل دقيقة،
    البعيد عن العين ساكن جوه القلب 24 ساعة وصورته مبتفارقش العين 24 ساعة و شاغل البال 24 ساعة،
    البعيد عن العين لو كان في إيدنا كنا بقينه معاه في 24 ساعة، مش كل حاجه تتقال تصدقها عمر البعيد عن العين ما كان بعين عن القلب..

     ▫️متعايرش الناس بماضيهم و لا مستواهم المادي أو الإجتماعي و لا حتي شكلهم و طريقة لبسهم أو شغلانه إشتغلوها، أنت متعرفش ظروفهم إيه عشان يوافقوا عليها، و لا حتي تعايرهم بذنب كانوا بيعملوه و بطلوا يعملوه عشان المعايره دي مبتطلعش غير من إنسان جوا أسود و مبيحبش الخير لحد
    وأتعود إنك تعمل الخير وترميه في البحر و البحر واسع و مسيره في يوم من الأيام هيرجع لك الخير ده خيراً كتير أوي بس أنت إصبر علي رزقك و أتعلم إن الصيد أهم حاجه فيه الصبر مش مهم المهاره و لا مهم القوة و لا الطعم اللي في السناره، أهم حاجه الصبر..

    ▫️ادي ضهرك للناس و عيش بطريقتك الخاصة الناس عايزه الحاجه اللي تبسطهم مش تبسطك و خلي دايما جواك جزء غامض وحاجه متعرفهاش لحد ولا لأقرب الناس ليك عشان لما حد يتغير عليك ميعايركش بحاجه حكيتها ليه وقت ثقتك فيه..

    ▫️و إياك و الظلم والله إحساس إنك تكون ظالم أصعب إحساس في الدنيا، و متستعجلش في الحكم علي الأمور و مترميش ودنك لأي حد و خد قرارك بهدوء وبتفكير عميق جداً عشان متظلمش حد معاك وبآت مظلوم وما تبات ظالم و تظاهر بالإكتفاء وإن كنت أكثرهم إحتياج..

    ▫️أتقي شر الحليم إذا غضب و صاحب الصبر الطويل ده لما بيقرر يتعامل معاك بالمثل و يثبتلك أنه كان بيفوت بمزاجه مش ضعف منه ولا سذاجه و بيكون عنيف أوي، و غضب الطيبين وحش جداً خلي بالك..!
    و شكراً أوي لكل واحد باع و مهمهوش العشره إتعلمنا منك إننا قبل مانسند على حيطه نتأكد إنها مش مايله الأول،
    و شكراً أوي إحنا إستحملنا كتير أوي و أقنعنا نفسنه كتير أنكم متقصدوش بس كفايه كده،
    و شكراً أوي عشان سيبتم مكانكم لحد يستاهله غيركم،
    و شكراً أوي علي الوجع اللي تذوقناه و الوجع ده لوحده قوانا أوي أوي أوي و علمنا كتير أوي أوي أوي و بجد والله شكراً ليكم ولو حتي مكانش قصدكم تجرحونا و لا كنا نهمكم في حاجه بس بجد بجد شكراً..

    ▫️عادي أوي إن حلم حد بالنسبه لحد تاني ممكن يبقى كابوس آه عادي مش مشكلة علي فكرة،
    و القلوب ليها مفاتيحها ساعات بتفتكر إنك معاك مفتاحها بتفتكر إنك صح وماشي سكة العاشقين و عايش في خيال أنت اللي راسمه بمزاجك و أنت اللي لونته بنفسك بلون وردي،
    وده مش عيب حسن النيه برده مطلوب بس ميكونش سذاجه و فيه حسن نيه بيوصل للسذاجه إنك مهما شوفت و سمعت مش مقتنع برده لإن مش كل العيون شايفه بعينك مش كل العيون شايفه الحلم زيك،
    ممكن تكون أنت كابوس بالنسبه لحد أنت حاطه في خانه الحلم،و متفرضش نفسك علي حد،
    و لو حسيت بس إنك تقيل علي حد إبعد علي طول في وقتها و متحاولش تقاوم ده..

    ▫️و لو عايز تفهم حد كويس شوفه هيعمل إيه في لحظة أختيار حر،
    ممكن تشوف حاجات مكنتش تتخيلها و اللي مبيصليش يصلي، دكتور يشربك سم و صاحبك يطعنك و عدوك ينقذك و الخادم سيد في أفعاله و السيد حقير جداً في أعماله و الملوك يرتشون و الصعاليك يتصدقون و لحظة الأختيار الحر بتبينلك المعدن الحقيقي للناس.

    ▫️و خلي دايماً ليك صاحب ترمي معاه كل أسرارك وتقوله اللي جواك كله ويكون عارف أنت هتقول إيه من قبل ما تقوله،

    مره قرأت قصة عن واحد كان عارف إنه هيموت كمان 5 دقائق فبعت رسالة لصاحبه و حبيبته قالهم أنا رايح تيجي معايا؟!
    وردت حبيبته قالتله رايح فين أنا مشغولة دلوقتي مش هقدر أجي معاك،
    ورد صاحبه قاله رايح فين من غيري إستناني جاي معاك و ضحك وغمض عينيه و سرح ثواني قبل ما قلبه يقف و أفتكر كل الدقائق اللي كان بيفضل يقضي فيها وقت مع حبيبته و سايب صاحبه،

    بس عرف في أخر ثواني من حياته إنه الصاحب الجدع و الصاحب اللي بدون مصلحه و الصاحب ده مش هتعوضه أي حاجه في الدنيا،
    و خلي ليك الصاحب ده اللي ينسيك أي هم ويوجهك للطريق الصح و الموضوع مش بكتر الناس حواليك و الصحاب مش بالعدد في الشدة هما أتنين تلاته بس عليهم تعتمد،
    و اللي بيستحمل تقل دمك و رخامتك وكئآبتك و رزالتك
    و اللي ترمي عليه كل اللي فوق كتافك
    و اللي يقف جنبك من غير ما تطلب منه
    و اللي تروح له متضايق ترجع مبسوط و خلي الصاحب ده دائماً في حياتك في الركن البعيد عشان ده رزق مش هتلاقيه عند كل الناس.

    ▫️و أتعلم أنك تفصل كل حاجه وتدي كل حاجه وقتها و البيت ليه وقته و أصحابك ليهم وقتهم و شغلك ليه وقته و حياتك ليها وقتها،
    و متشتكيش لحد من حاجه مزعلاك و متسألش ليه أنت بس متشتكيش و أنت هتعرف لوحدك مع الأيام السبب.

    ▫️و لما تاخد قرار خده صح من الأول
    و لما تاخد قرار متندمش عليه مهماً كانت عواقبه عشان أنت اللي خدته بنفسك و أستحمل نتائج قراراتك الغلط قبل الصح و متلومش حد علي قرار غلط أنت خدته و قراراتك مسؤوله منك أنت مالكها و أنت صاحب النعم والـ لأ فيها،
    و أتعلم تقول لأ كمان علي الحاجات اللي لازم يتقال عليها لأ و تسكت لما الكلام ميكونش ليه فايده،
    بس حلو أنك يكون عندك تأنيب ضمير وتأنب نفسك علي حاجه قولتها أو عملتها مكنش المفروض أنك تعملها أو تقولها عشان تتعلم..

    ▫️متجيش علي كرامتك و متجرحش كرامة حد عشان الأكتر من الوجع هو تمثيلك أنك راضي و خلي روحك بعيده متتعلقش بحاجه النهارده و أنت عارف إنها هتروح منك بكره،
    لما تحب حب إلا حته و خلي حته كده عشان أي إحتمال،
    و أتوقع أي حاجه من أي حد أحنا مش ملائكة إحنا بشر خلي نفسك عزيزه عليك،
    و 90 % من راحة البال بتكون في إهمال الناس و عمرك ما هتعجب الناس كلها و لا قراراتك هتعجب كل الناس و أهم حاجه أنك تاخد قرار أنت مرتاحله،
    بتكون حاجه صعبه لما تكون بسيط أوي في أحلامك و طموحك و طلباتك و رغم كده مفيش حاجه منهم تتحقق..

    ▫️متاخدش برأي الناس في حاجه
    أنت لو كنت ماشي صح في طريق النجاح الناس مش هتشوف ده بس هتشوف أن ظلك مايل فمتشغلش بالك برأيهم و كلامهم عشان محدش هيعجبه العجب حتي،
    و كل اللي يعجبك و ألبس اللي يعجبك،
    و الدعاء أدعي ربنا كتير أوي و متزهقش وأصبر و أدعي لحد ما الصبر يمل من صبرك بس أنت متملش ومتيأسش..

    ▫️اللي عملك بوك Block هيشيله
    و اللي خرج من حياتك هيرجع،
    و اللي عملك Unfollow دول أكتر ناس بتراقبك و بتتابعك،
    و اللي زعلك في يوم هيرجع ندمان،
    و اللي ظلمك ضميره هيوجعه أوي،
    و اللي أذاك هتتردله و هيفتكرك ساعتها و محدش بيمشي نهائي كلهم هيرجعوا،

    ▫️لما تختار أختار صح و خد اللي شبهك في كل حاجه
    في طباعك و دينك و أخلاقك و هدوئك و جنونك و صورتك و روحك،
    و سيبك من اللي بيقولك الأختلاف بيكمل الناقص الكمال لله وحده 😏

    و لما تدخل في صراع بين عقلك و قلبك أسمع لعقلك عشان متخسرش و أختار اللي يحترم ضعفك و ياخدك منه و يحوله لقوة مهماً كانت الظروف..

    ▫️خليك مؤمن بأنك ممكن تدخل في خلاف مع الحياة
    و ممكن تلاقي اللي تحبه و ميحبكش أو يحبك و متحبوش أو تحبوا بعض و الحياة متحبكوش،
    و خلي الباب مقفول عليك اللي بيحبك مش هيزهق من التخبيط
    و خلي باب دائماً مفتوح متقفلش كل الأبواب للرجوع سيب باب منهم موارب شويه لعل الله يحدث بعد ذلك أمراً فمتروحش أنت بقي و تقفل كل حاجه و كل باب،
    خليها علي الله و أرمي أتكالك علي الله و هيزرع في قلبك من الرضي بستان..

    ▫️أي حد ممكن يختارك و أنت في عز قوتك
    لكن مش أي حد هيقف و يسندك في عز ضعفك و أنت في عز أحتياجك لحد جنبك و يكون عنده إستعداد يقف معاك في وش أي ظروف و تعافر معاه لحد ما توصلوا للي أنتم عايزينه سوا و ميجيش يبيعك في أول الطريق أو نص الطريق و يقولك مش هقدر أستحمل و أكمل أنا آسف..!
    الأسف مبيكونش ليه طعم و لا بيداوي اللي أتكسر في الوقت ده..

    ▫️بلاش تيجي عليا و أنا محتاج لك وقت ما أحتاجك
    متبقاش موجود و أعدي من المرحلة دي لوحدي و أعرف إن عمري ما هحتاج لك تاني و لو كنت أخر واحد في الدنيا،
    و في حاجات كده ممكن في الأول تفتكر أنك خسرت الدنيا كلها لما تخسرها و مش هتعرف تعيش من غيرها بس لما تهدي و تفوق هتعرف أن حياتك عمرها ما كانت هتتصلح إلا لو خسرت الحاجه دي..

    ▫️كلمة قسمة و نصيب متتقالش في أي وقت ولا لأي حد
    أعرفوا كده كويس قبل ما تقتلوا حد و ترجعوا تقولوا عمل كده ليه و قال كده إزاي و الكلمة بتقتل أكتر ما بتوجع،
    آه فيه رجاله بتعيط و هو الجرح للستات و مش لينا..؟!!!
    ما فيه رجاله بتفكر في عز الليل في ناس باعوا و البعد أختيار و البقاء قرار و موضوع النصيب ده بيكون شئ مرعب و مش سوء ظن بالله، لكن بتترعب لما تفكر أن الشخص اللي أنت قبلته بمميزاته و عيوبه و أتعودت علي وجوده جنبك أنه ممكن يكون مش نصيبك،
    و هو ده النصيب مهماً تعمل ليك نصيبك و الموضوع مش سهل و لا بيتنسي مع الأيام بس أحنا بنحاول ننساه عشان ندي لنفسنا مساحة أكبر عشان نعرف نعيش ونكمل اللي باقي لنا.

    ▫️محدش هيطبطب عليك غير نفسك
    متصعبش علي حد و أوعي تعيش دور الضحيه أو تبان ضعيف قدام أي حد،
    الناس مش شايفه الدنيا بعينك هتشوفك بس ضعيف و مكسور و ممكن كمان متستحقش الشفقه عشان أنت عايش في غابه مش في جنة و وسط ملائكة،
    و متزعلش لما تدخل علي بروفايل حد عزيز عليك عشان تسلم عليه و تلاقي أضف صديق Add friend 🤣

    ▫️أضحك و لو جواك وجع الدنيا دي كلها
    و لما حاجه توجعك تيجي في بالك أو حد مات وهيوحشك أسكت و أعرف أن ربنا هيعوضك خير عن كل حاجه حصلت معاك،
    و عن كل لحظة جبرت فيها بخاطر حد و أنت اللي محتاج حد يجبر بخاطرك،
    و مش كل الناس بتتمنالك الخير و مش كل الناس مستنياك تنجح عشان تصقفلك،
    و أتعلم أنك تعدي و تتعامل بسطحيه و متاخدش كل حاجه علي محمل الجد عشان أكتر ناس هتوجعك هي اللي كانت أقرب الناس ليك في يوم من الأيام،
    و عشان تمشي صح في الحياة أتوقع أي حاجه من أي حد و متقولش ده واثق فيه و مستحيل يعمل كده عشان كل حاجه ممكن تحصل من كل الناس،
    و فيه مرحله كده في حياتك هتلاقي فيها دائرة اللا مبالاه و اسعه و مش كل حاجه هتفرق معاك و اللي يتصل يتصل اللي يسأل أهلاً وسهلاً و اللي ميسألش عادي ربنا معاه أكيد عنده ظروف و الدنيا مش هتقف عليك و خليك مؤمن بأن العوض من ربنا هيجيلك علي صبرك و إيمانك بيه.

    ▫️الثقة صلاحيتها موقف واحد بس و لو دخل الشك هتبقي بداية النهاية
    و كلمة آسف أو معلش أو مكانش قصدي هيعملوا إيه بعد الوجع ؟!
    هما لو عايزين ميكونش قصدهم مكانوش عملوا كده من الأول مكانوش وجعوك،
    و زمان كانوا يقولولنا هات كوبايه و أكسرها و شوف اللي أتكسر مبيتصلحش إزاي،
    و أي إعتذار مهماً كان مش هيرجعك زي الأول و اللي بيروح مبيرجعش و عود نفسك علي الصراحه في كل حاجه،
    الصراحه راحه مهماً كانت قاسية و هتلاقي أكيد حل لأي مشكلة لو فكرت بصراحه، بس لما تداري حاجه و لا مليون حل هينفع و الصراحه يا جماعة هي الحل والله..

    ▫️لو حد خرج من حياتك بمزاجه
    متزعلش عليه مدام ده قراره هو اللي مسؤول عنه بس مينفعش يرجعلها تاني وقت ما يحب و مش عشان هو وحش أو كده بس عشان هو أختار يبعد وقت ما أنت كنت في عز إحتياجك ليه،
    هو لو كان عايزك بجد و مكنش عايزك تتجرح و هو عارف إنه غالي عليك مكنش سابك و مشي،
    و لو حد خرج من حياتك وقت إحتياجك ليه متدورش عليه تاني و لو كانت روحك فيه،
    و كتير أوي بيجي علينا وقت نفتكر أن الحياة بتقف خلاص و بتكون لحظات وجع بس، و عادي كله بيعدي و هيجيلك حد ينسيك أي وجع قديم،
    الدنيا مبتقفش علي حد و كلنا فترات في حياة بعض و كلنا مجرد فصل في كتاب كبير و اللي وعدك يفضل معاك كذاب الوعود دي كلها مجرد كذبه بنهون علي نفسنا بيها الوقت و مفيش وعود بتتحقق غير وعود ربنا،
    و خليك مؤمن بالعوض من ربنا و أنك لسه محبتش الحد اللي يستاهلك وبعدين حياتنا هي كام سنة و عدى أكتر من نصهم فمفيش حاجه مستاهله والله إنك تشيل في قلبك من حد أو تقعد تفكر نفسك بحاجات ممكن تضايقك،
    و أتعلم منها و إركنها على الرف و إركنها وسط الكتب اللي كنت بتقرأها و إعتبرها روايه خلصتها و أدخل علي الروايه اللي بعدها و شوف حياتك هتمشي إزاي و الموضوع بسيط أوى والله،
    شيل الكلام جواك وأضحك وركب وش كل اللي قال قبلك مسمعش غير معلش..

    ▫️و متحلمش بحاجه مش ليك و أرحم قلبك و اللي يغلط في حقك سامحه من قلبك و أنت بتصلي و بتقف قدام ربنا تطلب منه السماح فمينفعش نطلب السماح من ربنا علي أخطائنا و أحنا مش قادرين نسامح اللي غلط في حقنا مهماً كان الغلط حجمه إيه و سامح برده،

    ▫️حضرة سيدنا رسول الله كان بيقول "اللهم أغفر لهم فإنهم لا يعلمون"
    متتكلمش وحش في حق حد أنت كنت شايفه في يوم حاجه كبيره و مهما حصل و مهما عرفت إنه قال أي حاجه خليك أنت برده الأحسن و أسكت و متتكلمش وحش في حق حد،
    و ياعم هما أعمارنا كلها كام سنة يعني بالطول بالعرض هيعدوا خلي صفحتك أنت بيضاء عند كل الناس حتي اللي غلط في حقك خليك أنت الأحسن و أنت هتنسي مع الأيام و ربنا هيكرمك بس هو ضميره هيوجعه و يوم ما يتردله هيفتكرك أوي والله كل حاجه بتترد و لو بعد سنين كتير أوي،
    و أعرف ناس أترد فيهم حاجات بعد أكتر من 15 و 10 سنين و ساعتها أفتكروا حاجات قديمه كانوا فاكرين أنهم نسيوها و أفتكروها والله كأنها حصلت لسه أمبارح بكل تفاصيلها الصغيرة و الكبيرة وربنا مبيسبش حق حد ظلم،

    ▫️و أنت لازم تعرف أن ربنا بيحبك و خليك مؤمن بأفكارك متغيرهاش عشان حد و هدفك في الحياة لازم توصله متبصش وراك اللي راح مش هيرجع خليك في اللي جاي و خلي آملك في ربنا دائماً كبير أوي،
    و مش هفكرك تاني و هقولك أدعي كتير أوي ربنا بيحب العبد اللحوح في الدعاء اللي ميملش من دعائه أبداً و عنده يقين في ربنا أن أحلامه هتتحقق عاجلاً أم أجلاً و قول علي طول ربنا يكتبلك اللي فيه الخير و أتعلم تقول ربنا يكتب اللي فيه الخير دائماً،

     ⚠️و نصيحه أخيره عشان أحنا بشر
    قاتل و أطلب المغفره و متبقاش مقتول و تطلب الشفقه و خليك عارف أن الأصعب من أنك تقتل حد هو إنك تديله فرصه تانيه للحياة و مبنموتش مرتين هي موته واحده و إرضي بقضاء الله،

    أنا عارف أن أنا تقريباً لمست قلب كل واحد قرأ للأخر و فعلاً أنت مدام قرأت للأخر أعرف أنك هتقدر تعدي حاجات كتير في حياتك الجايه عشان أخدت من خبرتى البسيطه.
        ♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡❤♡

    متنساش تسيب تعليق▼هــنــا 

    1. بااااشا 😻😻😻😻😻

      ردحذف
    2. الله علي كلامك بجد تسلم ايدك

      ردحذف
    3. الكلام جميل تسلم بجد
      كلامك عمل زى موج البحر فجاءه تلاقى الموجه فى وشك من غير مقدمات وبعدين مشاعرك تهدى زى ما الموج بيهدا
      بس كلامك ماينفعش يتشاف مره واحده كدا لأن كله حكم عايز تقرأ وكل فتره او كل ما يحصل معاك مشكله تشوف هتتصرف إزاى ولو اتصرفت تشوف اتصرفت صح. ولا لأ
      شكرا لمجهودك 🤍

      ردحذف

    التعليقات



    اتمنى البقاء على تواصل دائم ، فقط قم بإدخال بريدك الإلكتروني للإشتراك في القائمة البريدية السريع ليصلك جديد أولا بأول ، كما يمكنك إرسال رساله بالضغط على الزر المجاور ...

    إتصل بنا

    حكمة وأقوال

    ʘ لا يتم تقدير الصحة قبل المرض.

    ʘ الوقاية خير من العلاج.

    جميع الحقوق محفوظة

    بكره أحلي